Jun 26, 2019

Літары

уночы ўваходзіш у пакой
зьзяе клявіятура лэптопа
што не пасьпеў заснуць
і вось яны - тыя літары на камянях
тыя самыя праз тысячагодзьдзі
сьветлыя ў цемры

Дождж

Калі дождж - гэта мова,
якую мы не разумеем,
але намагаемся ўпарта,
і кідаем марныя спробы?

Feb 26, 2019

Вочы

а можа ты нарадзіўся
каб бог тваімі вачыма
галоднымі вызнаў нарэшце
сваю немагчымую немач

Oct 30, 2018

Ранак

шэры доўгі панылы ранак,
як жа больш цябе за мяне!
я аддаў табе ўсё, што маю,
і цяпер ніхто за цябе
не мацнейшы на гэтым сьвеце,
покі сьвет гэты - сьвет мяне

Mar 19, 2018

Паміж вяршыняў

Час доўжыцца і цягнецца прастора,
дарога губіцца паміж вяршыняў гор,
мы ўзгадваем, што памяталі ўчора,
як цягся час і доўжыўся прастор

Каліва

О каліва, закінутае ў цемру
брыняць вадой, ты скора станеш тым,
чаго ня знаеш, але мусіш ведаць,
каб гэтым новым немінуча стаць

Нішто

калі сьпярша адсутнічала ўсё,
чаго няма ўжо і яшчэ ня стане,
калі ўсё зноў абернецца ўнівіч,
ды не пакіне нават успаміну,
тады нішто ніколі не было