Бог Месца

А можа бог ёсьць месцам тым,
Куды вярнуцца ты павінен?
Ці можа месца богам ёсьць,
Адкуль зыйшоў ты назаўсёды?

Літары

уночы ўваходзіш у пакой

зьзяе клявіятура лэптопа
што не пасьпеў заснуць
і вось яны - тыя літары на камянях
тыя самыя праз тысячагодзьдзі
сьветлыя ў цемры

Дождж

Калі дождж - гэта мова,

якую мы не разумеем,
але намагаемся ўпарта,
і кідаем марныя спробы?

Вочы

а можа ты нарадзіўся

каб бог тваімі вачыма

галоднымі вызнаў нарэшце

сваю немагчымую немач